/p. 12/ coelo velut in tabula nodum arbitrabantur, error
deprehenditur. Sidus enim est coelum suum densum
et coelum est sidus suum rarum. Quippe ex partium
situ propinquiore tollitur pelluciditas, id
quod in tela densiore aut rariore, familiari exemplo,
observari facile potest. Alex. – Bone Deus,
quantum iacturae fit ab ijs, qui te non audiunt!
I. C. – Imo vero ab ijs, qui me audiunt.
DIALOGUS III
De figura et colore coeli.
Alex. –
Age nunc, Doctor Subtilissime, inquiramus,
quaeso, qua de causa rotundam
coelum retineat figuram.
I. C. – In promptu ratio est: nempe
quia coelestis illius animalis aeternitati
atque divinitati convenientissima erat
aeterna divinaque figura, qualis est sola circularis.
Alex. – Cur illam aeternam nominas? I. C. –
Multis quidem de causis. Quia dissolvi non potest;
est enim continua et unilinea, neque
punctum habet cognitum aut ita designatum
ut sit principium dissolutionis, quemadmodum
habent aliae figurae; qua enim committuntur lineae
angulares, ibi desinit quodammodo trianguli
constitutio. Et profecto desinit, quia ad aliam
sese transfert lineam, ut quod in ea linearum
commissura non potest esse, sit in alia linea.